Гьинава вун?!

Са вядеда зун жегьил тир звер алай,
Ганай на заз муьгьуьббатдин туьнт буза.
Гьинава вун?! Гилани вахъ вил гала,
Таниш я, руш, хам чандиз зи нуш суза.

Ви “лув гуниз” аскIан тир чи тепеяр,
Лугьудай на: - “Зун ви багъдин туш емиш”.
Гьевесри ви гузвай къати лепеяр,
Кьадарсуз вун а чIавуз тир безетмиш.

Вун кIан тахьай авачир гьич са эркек,
Агъзурни сад атанай ваз мусутIар.
Садан гафар акунай ваз яз керчек,
Разивилелд кьунай вуна гьадан тIвар.

Лагьаналдай, ша кьисметар сад ийин,
Арадал гъин бахтлу цIийи са хизан.
Диде, буба, мукьвабурни шад ийин,
Мехъерилай вуч аватIа, лагь, хъсанI

КIаниди, вун зи мурадрин мяден я.
Вун Эсли хьухь, зунни жеда ваз Керем
Акунай ваз ам виридлай кьетIен яз,
АлукIнай на фата лугьур агъ-перем.

Фад хкахьна гьевесрин цIай, хьанач йис,
Амукьна тек ялгъузвални дерин гъам.
Пишкешайди на ви рикIин паклу гьисс,
Керем тушир, ам яз хьана адан лам.

Адлай кьулухъ вун шумудаз яр хьана,
Ви рекье, руш, харж ийизвай девлетар.
Шумудан рикI вун паталди тIар хьана,
Гзафбуруз бахшна вуна леззетар.

Ипек-намус авай къизил чанахдихъ
На гунагьрив ацIай харал къачуна.
Сирнавзавай гьа яд фидай патахъди,
Гимиди хьиз елкен гару къазунай.

Амма лап фад катна фена вахт-душман,
Инсаф тийир жегьилвилиз, абурдиз.
Са вядеда гьевес къекъвей ширин чан
Ухшар хьана цIай кумачир тIанурдиз.

ГьакI ятIани, баркалла ваз, багьади,
Гьа арада зи шит уьмуьр ширинрай.
Жегьил чIавуз бейгьуш гайи гадади
Акъудзавач вун фикирдин деринрай.