Лезги чIал

ЧIал бине я- чи камалдин дегьне я,
Шумуд буллах къвез ви вацIук акахьда?
Хайи чIал хуьх- ам чи вилин нине я,
Чар булах я, куркурдивди авахьдай.

Виш асиррин ядигар яз атай чIал,
Мелик, Эммин, Гажи Давуд рахай чIал,
Турини хьиз душмандин рикI атIай чIал,
Вун халкь хуьзвай чи къалхан, чи даях я!

Вун шагьид я, алпанвидин кьисметдин,
Вун сагьиб я Сад Аллагьдин нуьсретдин,
Ивирар гвай цIун халкьарин адетрин,
Чаз уьмуьрда рехъ къалузвай маяк я.

Гьайбат вуч я гвай ви гьар са гафунив,
Дагъ атIурвал Шарвилидин турунив!?
Ваз тай авач севт-манидал лугьуниз,
Вун зи халкьдин ах, сабурни дамах я.

Виш асирра мидаим хьухь, лезги чIал,
Зи хайи чIал-чи намусдин гуьзгуь чIал!
Вун хуьн патал къурбандда за зи чан цIал,
Вун зи халкьдин ругьдин даях, пайдах я.
Физва уьмуьр…

Физва буллах-мелгьам дагъдин,
Куркурдин хуш ван кьилеллаз.
Физва буллах, наз-дамахдив,
КIам, вацI хьана, каф винеллаз.

Ел атайла, хъел атайла,
Муькъверни кваз тухуз жеда.
Кьере цIийи гел атIайла,
Вичин гьайбат къалуз жеда.

Аждагьандиз тешпигь аваз,
Тарар, валар винел алаз,
Гьуьлуьхъди физ аквада ваз,
КIане, къал кваз, къванер рахаз…

Эхир гьуьлуьв агакьайла.
Ван атIана жеда секин,
Ажухдин каф элекьайла,
РикIел къведа чешме вичин…

Чар буллах хьизфизва уьмуьр,
Ериш къвез-къвез, жезва яваш…
Гьар са куьнихъ ава эхир,
Вун, жезмай кьван, вилик тамаш…