КIаму садра селна лугьуз

КIаму садра селна лугьуз, 
Куьрда кьван ятар жедай туш, 
Ибну - Гьажар кIелна лугьуз, 
Гьардал алим тIвар жедай туш.

КIуфал атай -  татай рахаз, 
ЧIуруд ийиз акваз - акваз, 
Кхьидайдахъ фитнед кагъаз 
Гьич камаллу кар жедай туш.

Алдатмишиз кхьиз птик, 
Кутур лугьуз ам михьи цик, 
Ширин гафар хьунал мецик, 
Ахьтиндахъ гьунар жедай туш.

Хаинари рум гуналди, 
Мидяяр пис рахуналди, 
Садра хата кар хьуналди, 
Намуслуд санкIар жедай туш.

Жендек бицIи бязи балкIан, 
Тай ийиз жеч гьич ам ламран. 
Винел хьунал парар залан, 
Ламрак хьиз кIаркIар жедай туш.

Фагьум ая на, Сулейман, 
Гуьзет ийиз писни - хъсан, 
Гьар са жендек хьунал кьакьан, 
Намусдиз пайгар жедай туш.