Ахмакьвал пис четин тiал я

Экв таквадай буьркьуьдавай 
Ктабар кхьиз жедайд туш. 
Кpap  - яваш, гафар - кIеви 
Paxaз, кар туькIуьз жедайд туш.

Ахмакьвал я пис четин тIал, -  
Лугьунин кар жедач адал. 
Дерзи туширдавай партал 
Фурмадаллаз куьз жедайд туш.

Гафунал я кIан, кIукI тежер, 
Нубатсуз рахадай тIишер. 
Вич зулун йиф, вацран мичIер, 
Юкъуз хьиз экуьз жедайд туш.

Гьар ахмакьдиз вичин чка, 
Я къе тийижиз, я пака. 
Агъзур десятиндин чка 
Са мукалдал гуьз жедайд туш.

Акьулди гьакI кьатIуналди, 
Чарасуз вуна тIуьналди, 
Вун аш ийиз гатIуналди 
Мухакай дуьгуь жедайд туш.

Я кеш тийижиз, я кафал, 
КIвенкI авуна рахаз кIуфал, 
Сел къведайла вацIун рувал 
Архайинз къаткиз жедайд туш.

Kpap кьелечI, гафар яцIуз, 
Рахамир, тIиш пIузар кьацIуз. 
Гирвенка кьел Кьулан вацIуз 
Вегьиналди кIуь жедайд туш.

Шумуд ахмакь гъавурда тван, 
Шумуд айгьамдалди гатан! 
КIан хьуналди филдин гардан 
СикIрен хьиз шуькIуь жедайд туш

Эй Сулеймаи, вун я устIар, 
Авайд я вахъ хурун дафтар. 
Дугъриданни, вири затIар, 
Гьелбетда, сад хьиз жедайд туш.