Жеда кьван

Бязи бенде ламран къилих 
Хьана, гьа ериш жеда кьван. 
Пелен кьулал акваз тарих, 
Айиб кIевирун жеда кьван.

Филдилай вич кьуна чIехиз, 
Тежер пypap кIулал эхиз, 
АтIа кьил таквадай рекьиз 
ИкI кIевиз зверун жеда кьван.

Бегенмиш я вични вичиз, 
Акьулдиз гьич са затI течиз. 
Рахадай гафарни нашиз, 
Акьул икI дерин жеда кьван.

Я дуст чидайд туш, я мидя, 
Туна чанда гзаф иддя. 
ТIуьртIа нагагь, фад рекьидай 
ЗатI икьван ширин жеда кьван.

Я гьахъ чидайд туш, я гьисаб,
Акъатдай гаф, paxyн я таб. 
Михеннатдиз балкIандин цIап 
Лап еке серин жеда кьван.

Гафуникай тIар тавуна, 
Зерре намус, ap тавуна, 
Вичи са гьунар тавуна, 
Ужуз аферин жеда кьван.

Винел пад агъ яз къалуда, 
Къене патай хупI кьалуда! 
Вичин айиб тваз далуда, 
Сивик икI хъуьруьн жеда кьван.

Сулейман гьич рахач нашиз. 
Кхьихь гьар намерддин кIвачиз. 
Икьван жувал шак алачиз, 
Чинал эзберун жеда кьван.