Перейти к основному содержанию

За ийин тариф

Юлдашар, за ийин тариф 
Сифте эвел кьил шегьердин. 
Гьар са инсан гьакьван ариф, 
Акьуллу камил шегьердин.

Заз акурд я зулун чагълар, 
Гьар кьуд пад тир дере, дагълар, 
Гьакьван хъсан туькIвей багълар, 
Заз акур шикил шегьердин.

Гьар патахъай кефсуз инсан. 
Къвез, хъфидай хьана хъсан, 
Ятар авай михьиз «нарзан», 
Дарман квай къизил шегьердин.

Фагьумна за гьар идара, 
Гуьзел, гуьрчег гьакьван пара. 
Яру цуькверин арайра 
Къугъвадай билбил шегьердин.

Гьар са затIни гьакьван буллух, 
Гьич са куьникай тушиз дарлух, 
Йикъалай къуз пара артух, 
Хурам тир гевил шегьердин.

Сейрангагьда диши, эркек - 
Вири жуьт - жуьт, тIимил тек - тек. 
Сад садалай пара эирек 
Агьилни жегьил шегьердин.

Юкьвай фидай селлер, вацIар, 
Машинарни, автабусар. 
Артухариз туьквен, базар, -  
Гьа икI я майил шегьердин.

Гьич са синих кутаз жез туш, 
Инсанариз гьава лап хуш. 
Жизви - жизви эниш, юхуш 
ГьакI ава т1имил шегьердин.

Йикъалай - къуз артух башрат, 
Гьар са жуьредин имарат. 
Чи Советри гана къуват, 
Агакьзава гъил шегьердин.

3алум азар зав я мидя, 
Къастуниз зулум ийидай. 
Духтур юлдашар чи патай 
Гьарма са векил шегьердин.

Ай, Сулейман СтIалска, 
Гьим ятIа ваз акур чка? 
Яраб ятIа Къиславодска 
Вичин тIвар асул шегьердин?

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.