Гуьзел гатфар

Эй, юлдашар, бахтавар къар -  
Агакьна чахъ гуьзел гатфар. 
ХъуьтIуьз дустагъдавай халкьар 
На акъудна къецел, гатфар.

Чна далу агална вахъ, 
Чириз на чаз гьар са кIвалах, 
КIуьд вацра чаз къалурна ряхъ, 
Гьар са лежбер хьана уях 
А ви ширин ванцел гатфар.

Калхуздин юлдашар сад хьун, 
Хийир - шийир санал кIватI хьун, 
Йикъалай - къуз гевил шад хьун, 
Серин тарак жеда къаткун. 
Темягь жедач месел, гатфар.

Душман тир кьуьд чи винелай 
Вуна авурди я эляй. 
Акъудна чун гьадан гъиляй. 
Заз чидай гьал виридалай 
Майдин варз я эфзел, гатфар.

Урус чIалал рахаз мука:
Сегодня работа многа, 
Надо больше хлеб, мука, 
Корова, масло, молоко», 
Вавай чириз фу (а)вай чка, 
КIватI жеда ви варцел, гатфар.

Са кар мад ава заз лайих:
Ажалдикай ийиз чуьнуьх, 
Са кьуд - вад суз зун мад хуьнуьх. 
Зун кьейитIан нагагьдан, пих 
Эляда ви пIузал, гатфар.

Такьат завай хьана яргъаз. 
Кефсузвили зун кIевиз кьаз, 
Я жез авач хъуьрез - къугъваз, 
Заз кIандайвал чIалар рахаз, 
Къвез амач зи мецел, гатфар.

Сулейманан гафун а кьил:
Вичин винел жен ви и гъил. 
Шумуд са паб, шумуд са гъуьл, 
Гьич са инсан я жеч пехил 
ЦIегьрен хам хьтин зал, гатфар.

I937