Зи дустунлай накьан юкъуз
Зал гуьзел са чар атана,
РикIевай хуш мурад къалуз,
Лап зурба дафтар атана.
Жегьил йикъар хкиз рикIел,
Зани кагъаз авуна кIел,
ГьикI фенай чи йисар эвел,
Кхьенвай хатIар атана.
Бургьан Мисри галаз къунагъ
Са йифиз ваз хьайи саягъ,
Чаз экв къалуз гъиле чирагъ
Куьр ви хзанар атана.
Мад бахтлу хьуй Табасаран,
Дагълу тереф, гьамни Аран,
Гьар сад кьегьал, гьар сад аслан
Тирвилин хабар атана.
Ви дуст СтIал Суьлейман на
Шад а я мад къунагъ хьана,
РикIевай мурад къалана,
Лугьун за, дустар атана.
Рубрика
Добавить комментарий