Лап яру цуьквер я рушар

Гьукуматдин багъдин емиш, 
Таза тир бегьер я рушар. 
Гатфар бере дагъда битмиш 
Лап яру цуьквер я рушар.

Куьн мектебдиз кIватI хьухь буьтуьн, 
Гьарда чира илим дерин. 
Якъин чир хьухь, гьукуматдин 
Куьн вилин эквер я, рушар.

КIантIа диши, кIантIа эркек, 
Ихтиярар сад я, герек, 
Билбилрилай пара зирек, 
Куьн артух нуькIер я, рушар.

Фагьумнамаз бязи фурма, 
Бязибурун чIарар бурма, 
Гьар садан пIузарар хурма, 
Мецер куь шекер я, рушар.

Куь хасият фагьумна за, 
Куьн иер яб гуз акъваза. 
Цирав хипе хайи таза 
Куьн гьахьтин кIелер я, рушар
.
Вирибуруз кхьин - чIурун, 
Мажбур я куьн илим чирун. 
Квез кIани, куьн кIанибурун 
Куьн чанар, рикIер я, рушар.

СтIал Сулейманан луькIуьн - 
Метлеб гьакI я куь кар туькIуьн. 
Ам вирибур чидач заз куь, 
Садан тIвар Пенкер я, рушар.