КIандатIа ваз лап гьалал - гьахъ,
Чуьлда тамир хвар, рамагбан
Гатаз тамир вуна ви хъвяхъ,
Акъудда сухвар, рамагбан.
Беднякдин хва, вунни бедняк,
Яргъи юкъуз къекъвез гьелек,
Судни хьайла гьадан куьмек,
Жеда вун ярхар, рамагбан.
БатIул кьамир вуна зи гаф,
Гьар итимдихъ жедач инсаф,
Ихтибармир вуна гзаф,
Кьада ви гъаргъар, рамагбан.
Амукъда вун мет, кьил гатаз,
Кьве вилни килигиз муртIаз,
Яргъи йифи гьакI къвалар тIаз,
Я ваз къвеч ахвар, рамагбан.
Зи гаф ужуз кьамир вуна.
Нече шумуд чуьлда кьена,
Зегьметчияр чуьлда кьена,
АлтIушна чIагъар, рамагбан.
Даим кIарас гъиз къуьнелди,
Вуч затI атIуй ви хиялди?
Фагьум зулалай яралди,
Кьудкъанни цIуд къар, рамагбан.
Инсанар жеди вал пехил,
Мишекъат яз кIеви тир гъил,
Гьелбет, вав вахкудай техил
Еке пай нагъвар, рамагбан.
Сулейманаз чида эхир,
Ахьтинди къахчумир, фагъир,
Пуд киледкай кьве киле гъуьр,
Я жеч ваз чIахар, рамагбан.
Эй Сулейман, эвер, гьарай,
Гъафилбур авуд ахварай!
Мадни гъейри жуьр уьлквейрай
Юлдашар санбар хьана чин.
1925
Добавить комментарий