Гьа югъ я

Октябир инкъилаб цIаяр 
Мад куькIуьрди гьа и югъ я, 
Залзала жез чилер, цавар, 
Каф (и)видаллаз фейи югъ я.

Хаинариз, рикIер туькьуьл, 
Фяле юлдашари гана кьуьл. 
Чанарилай чIугуна гъил 
Кьве патахъни кьейи югъ я.

Куьгьне дагъдин икси къванар 
Пад - пад хьана ийиз ванар. 
Гьа - гьа дяве кIанер - пунар 
Эхир кьил гьам хьайи югъ я.

Куьгьне залумар кьве къатан 
Алуд авур гьакъикъатан, 
ЯкIар атIуз сада садан, 
Гьелбет, иви хъвайи югъ я.

Ленин юлдаш лугьудай кас 
Къазанмишай Совет власт, 
Кесибари гадарна яс, 
Кьилни чуру твайи югъ я.

Душманари дагуни аран 
КIаник кутуна чпин саран. 
Гьала, кесиб, гила девран -  
Якъин чир хьухь, им ви югъ я.

Кулакарин агьузарар - 
Дуьздиз акъатна азарар, 
Кьуна тIишер, гьакI пIузарар, 
Рахаз тежез квейи югъ я.

Чпи чпин кьилер гатаз, 
Батракар арада титаз. 
Мад кесибри сада садаз 
Муштулухар гайи югъ я.

Къад къаравушдилай кIвенкIве 
Аваз къекъвей бегдин бике, 
3алумар руфунар еке - 
Гьабрун рикIер кайи югъ я.

Кесибдин зегьмет недай кьван, 
Гагь яцIу жез, гагь - гагь кьакьан –
Гьа душандин кIвалин чукьван 
Хана, кIвалер уьцIей югъ я.

СтIал Сулейман, тамашиз 
Акъваз гьа хаиндиз вичиз:
Гьа тIуьр кьван затIар экъуьчиз 
Кеф рикIелай фейи югъ я.