Вун квахь, кьей куьгьне замана

Фад чидайд я чаз ви къастар, 
Вун квахь, кьей куьгьне замана. 
Кесибар тушир ви дустар, 
Вун квахь, кьей куьгьне замана.

Ви гъам - гъусса чна чIугун. 
Бес я ваз гайи порогун. 
Чаз кIандач ви куьгьне закун, 
Герек туш вун вилиз акун, 
Вун квахь, кьей куьгьне замана.

На чаз ягъай цIаяр - мурцар, 
РикIеллама залан йисар. 
Бес я на чаз гайи азар, 
Вун квахь, кьей куьгьне замана.

Яцар хьиз кутIунз викIиник, 
Гьамиша ви къузад кIаник, 
Девлетлудив завуд, фабрик 
Гуз, гьабурув тир вуч шерик, 
Вун квахь, кьей куьгьне замана.

Гьич кесибдин аялдив кIел 
Ийиз таз хьанач ви рикIел;
Девлетлу эхцигна кIвенкIвел, 
Саймишнач на кIутан мукал. 
Вун квахь, кьей куьгьне замана.

Фад чидай чаз ви хасият. 
Бес я на чаз гай азият.
Чаз герек туш ви несигьат,
Вавди гумач чи авсият,
Вун квахь, кьей куьгьне замана.

Хъуькъверилай маргъвар - маргъвар 
Чи авахьна фидай накъвар;
На ширнай чи вахар, рушар, 
РикIеллама чи гьа йикъар. 
Вун квахь, кьей куьгьне замана.

СтIал Сулейман фукъара, 
Гьелекна чун гьа йикъара, 
РикIин кIвенкI лап кIасна сара. 
Ви гьа чин хьуй уьзуькъара, 
Вун квахь, кьей куьгьне замана.