Эй юлдашар, и азадвал

Эй юлдашар, и азадвал - 
Ажайиб им гьат хьана чаз. 
Кесибарин рикIиз шадвал 
Хьана, лап регьят хьана чаз.

Куьне квевди фикир ая, 
3алумарал илиг пая. 
И мубарак тир гьадия 
Еке тир савкьат хьана чаз.

Чанар пучай юлдаш фяле, 
И азадвал къачур гъиле, 
Гьукуматдин мягькем къеле 
Зурба имарат хьана чаз.

Батракарин рикIин метлеб - 
Им хъсан кар хьана ажеб! 
Гьар са хуьруьз вичиз мектеб 
Авуниз ният хьана чаз.

Гьар са хуьре цIуд муаллим, 
Аялариз чириз илим,
Гьар са куьнкай хьана малум, 
ЦIийи тIебиат хьана чаз.

Гьар са юлдаш - диши, эркек - 
Асланар хьиз хьана зирек. 
Ленин юлдаш, - пара куьмек, 
Еке тир къуват хьана чаз.

СтIал Сулейманан суьгьбет:
Дуьз рахун я вири, гьелбет. 
Кесибариз гана зегьмет. 
Хьайи гьуьруьят хьана чаз.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.