Чан гайи Къазимегьамед

1.
Къазанмишиз и чи власт 
Чан гайи Къазимегьамед. 
РикI кутуна, авуна къаст 
Фяле хьайи Къазимегьамед.

ИкI хьана кьван вичин ният:
Гьар са халкьдиз гун гьуьрият,
Лежберриз - чил, гьакI авсият. 
Тир Ахцегьай Къазимегьамед.

Кьасумхуьрел атай бере, 
КIватIна дустар, тамам магьле,
Балшавикрин кьилни - кьиле 
Вич акъвазнай Къазимегьамед.

Чи балшавик Агъасийиф, 
Гьелбетда, акI рекьиз гьайиф! 
Ви рикI тушир кIусни зайиф, 
Чун уьтквемай Къазимегьамед.

Сулеймана икI лугьуда:
Душманарин вил акъудай 
Вун амукьда чи хуруда, 
РикIерин цIай Къазимегьамед!

2.
Инкъилабдин чими нурар 
Я чи уьлкведин рагъ, юлдаш. 
Ажи накъвар, какур турар 
Амач, кIандай вун сагъ, юлдаш.

РикIин гафар ви - рикIелла, 
Ви чими гъил зи къуьнелла. 
Дагъустанда тIвар мецелла, 
Вун я кьакьан чи дагъ, юлдаш.

Фяле, лежбер дустар кьуна, 
Гуьзел уьмуьр гьабруз туна. 
Якъин, вуна тармар уна
Куьгьне дуьнья а загъ, юлдаш.

Зегьметкешриз на туькIуьрна 
Бахтлу уьмуьр, рагъ куькIуьрна, 
Душманвилин цIай туьхуьрна, 
Ви рехъ хьана чаз бaгъ, юлдаш.

Сулейманаз вун сир хьана 
Са вахтара. Гил чир хьана 
Дустни душман. Зун цIир хьана 
Инкъилабдин, къуччагъ юлдаш.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.