Гьеле дяве куьтягь хьанвач

Фикир мийир замана я ислягь лагьана,
Бахтавар я, умунди я чи вахт лагьана.
Эхиримжи алчах душман кукIварна чна,
Рейхстагдин кукIвал тунай пайдах лагьана...
Ваъ, азизбур, гъалатI жемир, жаллатIвилин цуьрц
ХкечIнава вахтуникай - “зи тахт” лагьана.
ИкI террорди кьунва михьиз сергьятар гилан,
Инсаният, килиг, за вун куьтягьда лагьана.
Хъиткьинзава яшайишдин кIвалерни рекьер,
Низамсузвал - гьам язва чи силлагь, лагьана.
Гьелбетда, чун кьейибурун сиягьда авач,
Чи рекьени гел тухузва - агакьда лагьана.
И женгина яракь я чи анжах уяхвал,
Ам квадарна виже къведач, гьич шак тагъана:
Чун аскерар хьун лазим я алай девирда
Сагъламвилин къайгъуда чи икрагь тахьана.
Шагьбаладин и эвер гун гьахълу синагъ я,
Чи къуватрихъ а аксина Аллагьни гала.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.