Угърийриз минет

Са дугъри, кесиб касдин мецелай
Ажеб четин девир я, дугъривилиз  фу амач,
Къени ксар дуьньядал садани гьич кваз кьазмач,
Са экуь югъ, нурлу югъ дуьз  инсандиз аквазмач,
Дугъри касдин никIерал марфар  кьванни гьич къвазмач,
Гьавиляй, квез минет я, чан угърияр, яб це заз,
Зунни а куь жергедиз кьабул ая  фадамаз.
Белки а куь жергеда зазни са югъ аквада,
Юрфарани са тIимил ракъин нурар акьада,
Фал зи - дуьдгъвер, къафунни жеда  белки акадал,
Яхдиз къекъуьн тийирвал, жедайвал шив юргъада,
Чан угърияр “отказмир”, суваб жеда квез зурбаз,
Зунни а куь жергедиз кьабул ая фадамаз.
Ни гьар вуч лагьайтIани, угърийринди я девран,
Дугърибур куз-хъукъузва, чалкечиррив гва майдан,
КицIер элуькьрай чпиз, рекье жеда  мад карван,
Гьавиляй, яб акала, агакьрай квев  къуй зи ван:
Квехъ галаз шад ва кIубан акъатдайвал зи аваз,
Зунни а куь жергедиз кьабул ая фадамаз.
Вири элди ийизва йифиз-юкъуз куь тариф,
Дугъривиле фейи зи уьмуьр хьанва заз гьайиф,
Мегер им уьмуьр яни? Зулумат я  югъни-йиф!
Са югъ такунмаз вичиз рекьидач  гьич цимил кьиф,
Чан угърияр, минет я, гумир куьне  пара наз,
Зунни а куь жергедиз кьабул ая  фадамаз.
Зи дердериз, гъамариз дарман анжах куьн жеда,
Махарик квай, суьгьуьр гвай Лукьман анжах куьн жеда,
Зи рикІиз сабур гудай инсан анжах  куьн жеда,
Валлагь-биллагь, куь рекье къурбанд анжах зун жеда,
Чан угърияр, минет я, гумир икьван  жафа заз,
Зунни а куь жергедиз кьабул ая  фадамаз.

17.04.2014

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.