Алат, дердер...

Залай гъейри кас амачни дуьньяда?!
Алат, дердер, алат, залай гъил къачу!
Акъуд куьне нягьс гъилер зи яхадай,
Алат, дердер, алат, залай гъил къачу!

Гьавалат жез, кьаз куьне зи туьтуьн кІан,
Гьелекзава азабралди ширин чан,
Мегер яни зун квез гьа икьван масан?
Алат, дердер, алат, залай гъил къачу!

Са югъ, кьве югъ туш, им шумуд йисар я,
Гьи уьлкведай куьн атанвай азар я?!
Куь гъиляй зун зуьгьуьрт хьанва, бизар я,
Алат, дердер, алат, залай гъил къачу!

Къвез агатиз, эвер тавур мугьман хьиз,
Гьавалат жез гьалтзава куьн душман хьиз,
Тазвач куьне зав зи динни иман хуьз,
Алат, дердер, алат, залай гъил къачу!

Эхиз жезмач завай мад куь заланвал,
Заз къалурмир куьне куь гуж, султанвал,
Минет я квез, ая тІимил инсанвал,
Алат, дердер, алат, залай гъил къачу!

19.02.2009

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.