Рагар

Рагар, рагар - дагьарар тик,
ТIебиат туьнт къилихдин.
Лал шагьидар даим шерик,
Чи бубайрин тарихдин.
Яйлахрикай рагар жез куьн,
Миллионар яшар я.
Дуьнья акур, кьатIун-дерин
Агъсакъалриз ухшар я.
КукIушрай гъуз, марфар гатаз,
Селлери гъиз вугуз куьн,
Дерин гьуьлер ацIурзава,
ВацIаралди тухуз куьн.
Заз гьайиф я цуькведавай
Къацу атIлас кукIвариз,
Виш йисара чIуриз мешреб,
Элкъуьрзавай рагариз.
Виш бубаяр куь гъенерал,
Фикир, макьсад саф хьайи,
Гунагьсуз тир уьмуьр тухуз,
Гатал-гатал кIватI хьайи.
Гьа виридаз куь тIебиат
РикIивай хуш хьайид я,
Ишигълаван яйлахриз куь
Хуш майилар шагьид я.
Бубайриз хьиз, чазни квекай
Чими гьиссер дерин я.
Куь кьакьанвал, жанлу къамат
РикIиз пара ширин я.
Гуьзел мешреб фикирда кьаз,
За ашкъидиз вегьиз куьн.
Гьар са шикил хиялра тваз,
КIанда, валлагь, кхьиз куьн.
Гагь квез саврух къвез акьалтиз,
Гагь къати гар кьибледин,
Гагь алахьда югъ гуьзгуь хьиз,
БашкIул тадач цифедин.
Рагъ гьуьм гьатда гьар талада,
Гурмагърай гум атай хьиз,
Хайи дагълар гагь аквада
Капан юкьвал алай хьиз.
ТIебиатдин шикилар ви
ГьикI тан фикир тагана,
Къвез лишандик акъваздайбур
Дагъдин мурцал атана.
Тик къаядал суьруьдин шагь
Такабур кьун уях я.
Къайи шагьвар пеле акьаз,
И дагъларин дамах я.
На лугьуди и гунагьсуз
Бахтавардиз иервал
Ганва вири и яйлахрин
Перишанди тежервал.
Вацран ишигъ секин дагъда,
Сегьер ракъин нурарин,
Яргъи рушар цавун тагъда,
ЦIайлапанар цаварин.
Миже квай векь цуькведавай,
Чиг ацукьай цаварин.
Чешнедай къвез гуьнедавай
Гьамга таза ятарин.
Алахьай югъ, рагъ алцифай,
ТIебиатдин гумрагьвал,
Регъел цифер, яр къекъифай,
Вили цавун фирягьвал.
Регъелрик квай свалар, къветер,
Сесер ширин авазрин,
Дагъдал къвайи живед эсер,
Туьнтвал къайи аязрин.
Лув гуз цава гъерездаллай,
Ем гуьзетиз варцаралд,
Зурба лекьер къвез ацукьдай
Дагьардин тик мурцарал.
Туьк хьтин векь, сувун къужах,
Ширин сесер туртурдин.
Гьейран жедай руьгьдин дамах,
Мешреб сувун абурдин.
Чи аял вахт, майдин сувар,
Майовкайриз физ хьайи,
Алахьай югъ гуьзел гатфар,
Цуьквер кIунчIар гъиз хьайи.
Куь ценерал, яйлахар нез,
Хкажна сес кфилдин,
Лаз алатна суьруьяр къвез,
Шаддай дамах гуьгьуьлдин.
ЦIуд агъзуррал хипер, цIегьер
Гьар къуз ацаз парахдай.
Целералди хкиз некIер,
Таза ниси, къаймахдай.
Хипер, кIелер какахьдай вахт
Гьикьван яб гуз кIан жедай!
Абрун ванцел вири яйлах
Оркестрдин ван жедай.
Сувун чинлай векь ядайла
Дергес хьел хьиз хкатдай.
Къайи яд хъваз, гьекь авадриз
Чандик гьевес акатдай.
Хуьруьн жегьил гадани руш,
Вири сувуз экъечIдай,
КIунтIар ийиз марквара тваз,
Шад зегьметдик экечIдай.
Виш гектаррал сувун майдан
Твайи кьил хьиз хкатIдай.
Айиб кар тир кьулухъ къвазун,
Тади гьалда хкатдай.
Лугьумир хьи ибур вири
ГьакIан кьуру сесер я,
Валлагь, биллагь акур кьванбур
РикIиз чими гьиссер я.
Четинни тир, жегьилни тир,
Къастуналди кIвалахдай.
Гишинни тир, кьецIилни тир,
Амма кардал дамахдай.
Къе аранда са зур га гваз,
Арза, ферзе бул жеда.
Мелер ийиз эрекьар хъваз,
Гзаф гугьул тIул жеда.
Къе аранда - чилин кьитвал,
Четин жезва къвердавай,
Сергьятар къвез агатзава,
Хуьрер фирягь жердавай.
Арандин чил кьит хьанватIа,
Чахъ баркаван дагъ ава.
Цуьк акъатай сувул майдан,
Бул къацу векь, рагъ ава.
Векьер яна хкиз хьун - ам
Чи суьрсетдин бине я.
Иесивал ийиз хьун-ам
Чи жуьрэтдин чешне я.
Къе ислягьвал, вахтар секин
Гьикьван рахан, дад авач.
Жегьилар чахъ - картар хьтин,
Руьгь хкаждай сад авач.

Комментарии

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.