Муьгьуьббатдин дарман яни?

Вилер хъуьрез, къуьнер чуькьвез,
ПIуз алчудриз, зур гана заз.
Лацу лиф хьиз, гарал элкъвез,
Ви гьейбатри кIур гана заз.
Фена виликай са гуьзел къуш,
Акур вилер тух хьана зи.
Фикирар зал хьана алтIуш,
РикIиз раб хьиз сух хьана зи.
На лугьуди, пагь, зи вилик
Экуьнин са гъед аватна,
Вил хкIурла адан чиник,
Фикирда на - къвед акъатна.
Ахъа тахьай са цуьк хьтин,
Сифте къелем бегьер я жал.
Назик гъилер гьа туьк хьтин,
Цуьквед къамат - тегьер я жал.
ЧIулав чIарар, катран вилер -
Дагъдин хаму жейран яни?
Шумал буй ви, некьид хъуьхъвер
Муьгьуьббатдин дарман яни?
РикIиз зи хуш экуь чирагъ,
Женнет багъдин къумрал я вун.
Пелен юкьва къугъвазвай рагъ,
Лезгистандин марал я вун.