Яргъа хьухь!

Чин атIана жакьвадай,
Масад виле таквадай,
Кьама ял тваз дакIвадай,
Зегьердивай яргъа хьухь!
ГъвачIи-чIехи такьадай,
Вич бегенмиш аквадай,
Цаз хьиз виле акьадай.
Гьантердивай яргъа хьухь!
Вичин хийир атIана,
Ичкидив вич гатана,
Хизан гьарнихъ чкIана,
Хъвадайдавай яргъа хьухь!
Талгьуз хийир - зарарни,
Ял тежер кьаз парарни,
Гьахъсуз ийир къаркъарни,
Лагьлагъчидвай яргъа хьухь!
Рахун вичин итим я,
Вичиз-вич са гьаким я,
Хуьдайди къуз са ким я,
Темпелдивай яргъа хьухь!
Даим ийиз гьерекат,
КIвале жедач берекат,
Мез - гъери, вич - мишекъат.
МутIлакьдивай яргъа хьухь!
Вичин кIвалах туькIуьрдай,
Гъейридан кIвал уьцIуьрдай,
Дердини рикI дакIурдай,
Иблисдивай яргъа хьухь!
Сифте ширин агат жер,
Руш тухвайла къакъат жер,
ЦIайни-цIелхем акъат жер,
Къавумдивай яргъа хьухь!
Дуст, дуст лугьуз агатдай,
Ахпа виляй аватдай,
Душман хьана къакъатдай,
Дустунивай яргъа хьухь!
Чан лагьана эгечIдай,
Чан къачуна къекъеIдай,
Инсанвиляй экъечIдай
Пехилдавай яргъа хьухь!
Гьахъни-нагьахъ течир - терс,
Хуьз тежедай пехъи нефс,
Виш граммдихъ гудай сес
Ягьсуздавай яргъа хьухь!
Кьил тахьайди вич кIвале,
Насигьатчи я киме,
Фитнедин квал квай мецек
Къанихдавай яргъа хьухь!
РикI зегьер яз, мез къезил,
Сая залан, гвай фигъил,
Къуншид вечрез лугьур фил
Батмандивай яргъа хьухь!
Фендигардихъ фенд жеда,
ЦIуд кицIелай бед жеда,
Керекулни къвед жеда,
Гьахъсуздавай яргъа хьухь!
Агь, Рамазан, ваз гьикьван,
Гъахъсузвилер я такIан
Вак акваз, гел кьур гьакIан
Ферсуздавай яргъа хьухь!