Эй жегьилвал!

Эй жегьилвал! Вучиз закай катзава?
Яваш ая жуван йигин къадамар.
Вуж паталди цайи цуьквер кьуразва?
Уьмуьрдин пар хьанвач гьеле тIарамар.

Эй жегьилвал! Акъваз тIимил, яб це на:
Катмир закай михьи рикIиз къаргъишиз.
Цайи цуьквер ярдин гъилиз вахце на,
Ахпа алад пашман йикъар бамишиз.

Экуь мурад Лезги халкьдиз багъиш на,
Адан кьулухъ Шагь дагъларин пайгар яз,
Диде, буба, къуни-къунши саймишна,
Гьата рекье чи дагъларин заргар яз.

Гьич садрани баят чилел суст жемир,
Пехил жемир чара касдин уьмуьрдал.
Руьгьдин симер пис ксарив куз тамир,
Кьезила дерт лезги рикIин кфилдал!

Квахьдай накъвар зи вилерин булахдай,
СтIалар хьиз чиг марфадин аватай.
Вахтар къведа зи халкьди вал дамахдай,
Йикъар къведа цифер, тIурфан алатай!

Эй жегьилвал! Жегьилвал хуьх чилин чи,
Адан чинал пашман бириш татурай.
Заз чида: четин я рехъ, серинни,
- Зи хайи чил къуй шадвилив ацIурай.

Эй жегьилвал! Хуьх на рикIин терезда,
Дидедин нагъв, бубадин тIал, мекьерни.
Ирел хьайла чи куьмекдиз на звера,
Шадара чил, чи лезги кIвал, мехъерни!

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.