Кас жедани?

“Зун итим я”, лугьуз рахаз,
Югъди - йифди куьчедаваз,
Махуркадин пIапIрус чIугваз,
Майдан хуьдай кас жедани?
“Зун чIехид я”, лугьуз кIвале,
Гъил эцягъиз папан пеле.
ЗатI авачиз вичин кьиле,
Дамахардай кас жедани?
Хъун тавуна эрекь, чехир,
Гьич хизандиз гудач хийир.
ГьикI хьурай бес эвел-эхир,
Икьван авам кас жедани?
Хъвадач лугьуз вуна якъин,
Куьз кьазва бес балайрал кьин?
Вилер хьана чапрас вичин,
“Хъвазмач” лугьур кас жедани?
Хулиганрин хьана юлдаш,
Гьич руфуниз гудач на каш.
ЖагъайтIани са кьару тIач,
Тадиз хъвадай кас жедани?
“Куьчебег” я лугьуз на вун,
Вуч пеше я къумар къугьун?
Тух жедач, дуст, адал руфун,
КIвалах такIан кас жедани?