Перейти к основному содержанию

И дуьньядиз ава вичин къенивал

И дуьньядиз ава вичин къенивал:
Хъартас хуьруьз рагъ янава гьуьлелай,
Гьихьтин меки янар гузва пелелай,
Дуьнмиш жезва, чандал къвезва кIанивал.
И дуьньядиз ава вичин къенивал.

Хъартас хуьруьз рагъ янава гьуьлелай,
Вични гьихьтин, чуьхвей цавун дегьнейри,
Эрзимандиз кьабулзавай магьлейри.
Тебрикзавай югъ цаварин тIварцIелай.
Хъартас хуьруьз рагъ янава гьуьлелай.

Гьихьтин меки янар гузва пелелай,
Амма кIанчни агакьна ви мекел гъил,
Къушариз гуз цаз жедайвал синел сил.
Энтигъа мег авачир мад вичелай
Гьихьтин меки янар гузва пелелай!

Дуьнмиш жезва, чандал къвезва кIанивал,
Сад лугьудай танишвилел дамахна,
Гьиссерини рикI падзава алахъна,
Чилиз-цавуз гузва чпин дугъривал.
Дуьнмиш жезва, чандал къвезва кIанивал.

И дуьньядиз ава вичин къенивал.
Ракъини вун кьула тунва элкъуьрна,
Вунни вичин са ишигъ хьиз туькIуьрна,
Къалурзава вичин майил, багъривал.
И дуьньядиз ава вичин къенивал.

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.