Триолетар

Жуьреба-жуьр я инсанрин кьисметар.
Нивай вилик пад кьаз хьана кьисметдин?
Аваз чпин дадар, рангар, сифетар
Жуьреба-жуьр я инсанрин кьисметар.
РикIе аваз хьун мумкин тир гьуьрметар
Карагда сир дуьшуьш тахьай, хелветдин.
Жуьреба-жуьр я инсанрин кьисметар.
Нивай вилик пад кьаз хьана кьисметдин.
* * *
Физва, физва вун экъечIна сефердиз.
Зун алайвал рекьел туна вил алаз.
Зи гъилик гар хкIазва, ви кифер хьиз,
Физва, физва вун экъечIна сефердиз.
Ви вилер заз, вили цавай гъетер хьиз,
Килигзава, пелел мекен тил юзаз.
Физва, физва вун экъечIна сефердиз,
Зун алайвал рекьел туна вил алаз.
* * * Йиф тир чун рехъ яргъи ийиз алахъай.
ЦIар илитIна чна вири шегьердал.
Къакъатнай чун ви кIвалерин цлахъай -
Йиф тир чун рехъ яргъи ийиз алахъай.
Зун атанай гъетер кIудиз алакьай.
Ви кьве вилин тамарзлу тир эвердал.
Йиф тир чун рехъ яргъи ийиз алахъай,
ЦIар илитIнай чна вири шегьердал.
* * *
Къайивилиз баркалла и живедин.
И живедин лацувилиз баркалла.
Зун гьевесда гьатнава са бикедин.
Къайивилиз баркалла и живедин.
Чим явашрун къаст тир рикIин пердедин
ХъуьтIуьн цикIин хамувилиз баркалла.
Къайивилиз баркалла и живедин.
И живедин лацувилиз баркалла.
* * *
Къураматдиз лаз чкIанва живедин.
Гьуьл, атIугъай зулун цав хьиз, аквазва.
РикIени дерт ава лацу бикедин.
Къураматдиз лаз чкIанва живедин.
Лацу мармар муьгьуьббатдин бинедин
Чархал даим имарат яз алазва.
Къураматдиз лаз чкIанва живедин,
Гьуьл, атIугъай зулун цав хьиз, аквазва.
* * *
Ви кьечIемдал вилер ала агъзурдан
Хан-пачагь я вун жегьилрин рикIерин.
Язух я вун са сеферда акурдан.
Ви кьечIемдал вилер ала агъзурдан.
Ам кьечIем туш, рехъ я дерди гьазурдан,
Вичяй фидай сагъ са рамаг гьиссерин.
Ви кьечIемдал вилер ала агъзурдан.
Хан-пачагь я вун жегьилрин рикIерин.
* * *
Вуна куь кIвал яргъал ала лугьузвай,
Амма ам лап япун кIанел ала хьи.
КIвачери ваъ, чун гьиссери тухузвай.
Вуна куь кIвал яргъал ала лугьузвай.
Сад гьарагъиз, садни лугьуз цавуз гьай.
Сад хъфена, сад гуьрцелдив гума хьи.
Вуна куь кIвал яргъал ала лугьузвай,
Амма ам лап япун кIанел ала хьи.
* * *
ЭкъечIна зун чун кьвед къекъвей кIунтIариз.
Ви кIвачин са гел алама жигъирдал.
Гьевес хкаж хьана вини цавариз,
ЭкъечIна зун чун кьвед къекъвей кIунтIариз.
ХъуьтIуь вичин чка ганва гатфариз.
ЧIиж элкъвезва гуьлчимендин атирдал.
ЭкъечIна зун чун кьвед къекъвей кIунтIариз.
Ви кIвачин са гел алама жигъирдал.
* * *
Чилел гатфар атанва - цуьк къалин я.
Ви рикI вучиз дар я цIинин гатфариз?
Марфни, рагъни бул я, чил-цав эркин я.
Чилел гатфар атанва цуьк къалин я.
Са цуьк экъетI хьанвач, гьеле секин я,
Гьеле майил къалурнавач цавариз.
Чилел гатфар атанва - цуьк къалин я.
Ви рикI вучиз дар я цIинин гатфариз?
* * *
Ви манийрин ширинвилин тарифди
Къизгъинвални зарб гузва ви кьуьлериз.
Варзни цава шадарнава къе йифди
Ви манийрин ширинвилин тарифди.
Къимет гузва агъзурни са арифди
Ви сесиник къешенг жезвай рикIериз.
Ви манийрин ширинвилин тарифди
Къизгъинвални зарб гузва ви кьуьлериз.
* * *
Зун гилани физма гарун къаншардиз.
Я гар, вун мус акьада зи далуда?
Гьиссер вири цава ава, къушар хьиз.
Зун гилани физма гарун къаншардиз.
Зун шумудаз келлегуьздиз ухшардиз
Аквазва гар къекъвез лацу чуруда?
Зун гилани физма гарун къаншардиз.
Я гар, вун мус акьада зи далуда?
* * *
Чепелукьдин гуьгъуьна зун гьатнавай,
Дере атIуз, тепе атIуз калтугиз.
Жуван рикI гваз фер атана гьатнавай
Чепелукьдин гуьгъуьна зун гьатнавай.
Чепелукь заз акунач - кьен ктIанвай
ТIунав цIарнах гвай ракъинал алугиз.
Чепелукьдин гуьгъуьна зун гьатнавай,
Дере атIуз, тепе атIуз калтугиз.