Перейти к основному содержанию

Жив къваз ава кьилел зи

Рик1ин къенел хер ала зи
Са кар себеб яз.
Я вафасуз, вуна ч1урай
Икърар себеб яз.

Къекъведай чун, гьуьлуьн кьере
Къуьн-кьуьне аваз.
Хиялзава за а бере
Рик1ел хер алаз.

Пехил тир чал чилни-цавни,
Лап дили гьуьлни,
Бульвардавай агъзур жуьре
Билбилни гуьлни.

Верци-верци рахадай чун
Чи ватандикай.
Тух жедачир гьич са-садан
Ширин чандикай.

Чун чилерал, чун гьуьлерал
Санал къекъвенай
Эхь, са юкъуз бейхабардиз
Чи чарх элкъвенай.

Вучиз ят1ан дегиш хьана
Агатна вун зав.
На лугьуди, дегиш хьанай
Чилни, гьуьлни, цав.

Гьуьлел т1урфан, цаварал циф
Чилел вун хьана.
Вуна лагьай гьар келмеди
Вакай рик1 хана…

Чун сад-садаз къайи хьана
Несиб хьанач мад.
Дигай к1валин экв хьана вун
Уьмуьр гьална шад.

…Ингье вун зал дуьшуьш жезва,
Тахьун хъсан я.
И кьве вилиз, ви къайи чин
Тахкун хъсан я.

Им вуч гьал я, к1ирна гардан
Кьил хьанва агъуз?
Гадарнава «багьа» ярди,
Амукьна ялгъуз.

Амма мад вун акур ч1авуз
Дарих жеда зун.
На хер авур жегьилвилик
Къаних жеда зун.

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.