Дустар ава захъ

Сифет мублагь гатфар хьтин дустар ава захъ.
РикIер цIуру сафар хьтин дустар ава захъ.

Гьатай чIавуз сагьиб зиян хкIадай кIеве,
Шагьиддизни авур зиян такьадай хиве,
»Чан, рикI – лугьуз, хъуьтуьл хьана къекъведай сиве,
Ягьсуз папан гафар хьтин дустар ава захъ.
Себеб: фад-фад дегиш жедай къастар ава захъ.

Титаз лацу живедални жуван чIулав гел,
Абру даим гьейранарда дуьзвилелди эл.
Темягь фидай цуьквер, векьер хунча яз кьилел,
КIаник лил квай чIафар хьтин дустар ава захъ.
Себеб: фад-фад дегиш жедай къастар ава захъ.

Атай чIавуз ферли са кар гъиляй хатадай,
Мухал хвейи верчери хьиз лувар гатадай,
Гагь-гагь кьуру гугрумариз цава ван твадай,
Гатуз къвадай марфар хьтин дустар ава захъ.
Себеб: фад-фад дегиш жедай къастар ава захъ.

Дамахда за и дустарал, гзаф шад я зун.
Икьван чIавалд тахьай хьтин бахтлу сад я зун.
Абрухъ галаз санал гагь кьуьд, гагьни гад я зун.
Кьве чин алай афар хьтин дустар ава захъ.
Себеб: фад-фад дегиш жедай къастар ава захъ.

1961