Жаваб це

ЧIарар сару, вилер чIулав,
Хам пIузарар сад са ялав,
Акваз жеда рушар къвалав
Гуьзелрин таж-цуьк хьана вун.
Лагь, гьи хуьруьз акъатнава,
Муаллим руш, гьикI хьана вун?

Дуьшуьш хьайла зал,
Твамир чина шал.
РикIиз хуш я зи,
Руш ви гуьзелвал.

ТIакьунамаз экуьн ярар,
Чанда гьатна къайи гарар,
Эвягъдайла чуьлди чIарар,
Чилел атай чиг хьана вун.
Лагь, гьи хуьруьз акъатнава,
Иер суна, гьикI хьана вун?

Патав гвайла вун,
Акатна зурзун,
Мекьеди кьур хьиз
Амукьзава зун.

Лацу гъилихъ сят, цам галаз,
Шумал буйдал ипек алаз,
Школьникриз рекьер къалаз
Акурла, зи рикI хьана вун,
Лагь, гьи хуьруьз акъатнава,
Я Саният, гьикI хьана вун?

Це заз са жаваб,
Хьурай ваз суваб.
Мад зи рикIивай
Хъижеч амач таб.

1960