Перейти к основному содержанию

Куьреда цiийи муьгъ

Эвел тадбир авур юлдаш 
Хьана арифдар и муькъуьн. 
Лацу къванцив дяве - саваш 
Хьана кьван санбар и муькъуьн.

Гьукуматди кьуна гъиле. 
Гуьзайдин акъатна кьиле. 
Шумуд техник, шумуд фяле 
Хьана инжинар и муькъуьн!

Вагъунралди къум цементни, 
Тваз арада вили куьни, 
Шумуд мусурман, эрмени 
Хьана кьван ycтIар и муькъуьн.

ВацIун фитнедикай секин, 
Амач чахъ а рахун - луькIуьн, 
Шумуд чIуриз, шумуд кхьин 
Хьана кьван дафтар и муькъуьн.

Шумуд къубу, шумуд булах 
Гуьргенивди хьана уртах! 
АкьалтIай кьил Кьукьмадин дагъ 
Къведайд я ятар и муькъуьн.

ЦIерид тагъ, цIемуьжуьд стун 
ИкI мягькем сад садав гутун! 
Тамам Баку, Тифлис, Батум 
Жез туш барабар и муькъуьн.

Хайбар къеледлайни кIеви 
Туш лагьайтIа табда сиви. 
Истамбулда Ая - Суфи 
Белки жен ухшар и муькъуьн.

Тамам Куьре эгьли вири 
Жем хьана чун куьлуь, ири. 
Чи чIехи тир юлдашари 
Ачухна чаз вар и муькъуьн.

Заманадин дерин, даяз 
Фагьум ая гьарда жуваз. 
И кар чидач Сулейманаз, 
Нинд жедатIа тIвар и муькъуьн?

1929

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.