Мидявал квахьна хьи

Чи СтIалрин хуьре садра 
Ихьтин агьвалат хьана хьи:
Гьар са мидяд чпин apa 
ТуькIуьрдай ният хьана хьи.

Къанни цIукьуд - и душманар, 
Гадарна гинек квай къванар, 
Ихьтин намус, ихьтин гьунар, 
Зурба тир къуват хьана хьи.

Са юлдашар хьана шерик, 
Терг авуна фитне - чуьруьк. 
Чир хьана, чи жемятарик 
Лап еке гъейрат хьана хьи.

Гьар са чилин гьар са раис, 
Хемис юкъуз хьана межлис, 
А инсан хьи амалар пис 
Титаз мишверат хьана хьи.

Ихьтин хъсан фикиридай, 
Пис тир крар туькIуьридай, 
Меслят чирагъ куькIуьридай 
Таза гьукумат хьана хьи.

Гьатна рикIе къени хиял, 
Эркер, диши, эгьли, аял, 
КIани патахъ авуна ял, 
Уллу жемият хьана хьи.

Къерехдин юлдашар, эллер, 
Фагьум ая и чи гьалер, 
Ахъа яз гьар патахъ вилер, 
Ахварикай кват хьана хьи.

Чун хьиз ахварай куьн ават, 
Терг ая куьгьне адават, 
Идлай виликан хасават, 
Винелай алат хьана хьи.

Гьарда вичин ийир - тийир, 
Фагьум ая зарар - хийир, 
СтIал Сулейман я шаир, 
Гьам гъавурда гьат хьана хьи.

=======================

Са кар кIанда заз гьа икIиз, 
СтIал Сулейманан рикIиз, 
Къаст гьам я зи: хъуьтIуьн цикIиз 
Ви кар суддиз гун, чимивал.

I935