Марият кьена хендеда хьайила

Я жемят, заз авай жафа 
Садазни хабар авач кьван. 
Гьич са бенде вичихъ вафа, 
Гила ихтибар амач кьван.

Паб кьена ялгъуз хьайила, 
Виниз кар агъуз хьайила, 
Гила зун ажуз хьайила, 
Межлисда зи тIвар амач кьван.

Я жемятар, заз кIевелай 
Гумир фикир, куьне иляй, 
Аватна зун гъиляй - виляй, 
Садазни бакар амач кьван.

Инсанаркай са-са бязи 
Гафар кьабулзамач хьи зи, 
Гила закай зи халкь рази 
Жедай захъ са кар амач кьван.

Хажалатар хьана залан, 
Шумудаз за дерди къалан, 
Зи и кардиз гьич са план 
ЧIугвадай устIар амач кьван.

Тамам и Куьре вилаят 
Чидайбур я зи гьикаят, 
Низ авуртIан за шикаят, 
Ван кьведай япар амач кьван.

Гьикьван ийин за зи тешвиш, 
Гьар са сятда са шумуд виш, 
Гъил вегьена гьич са емиш 
АтIудай заз тар амач кьван.

Ишехьдай кьван амач нефес, 
Я ван амач, я захъ са cec, 
Къавум - къардаш, магьле-мирес, 
Къирахда дустар амач кьван.

Ширин мез аваз рахадай, 
Вични жен велед тахадай, 
Зи яшлувиливди кьадай 
Гъуьлуьз фир папар амач кьван.

Эй, Сулейман, жемир верем, 
Ам вун хьиз каначни Керем? 
Вун паталди гьич са къелем 
ЧIугвадай дафтар амач кьван.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.