Перейти к основному содержанию

Гъуьлуьнни папан гьуьжет

Гъуьл
ХупI ашукь тир вун зал эвел, 
Гьар акурла жедай хвеши. 
Гила табдил хьана ви гьал, 
Ихьтин гафар рахаз наши.

Паб
Ашукь хьанай зун вал эвял, 
Течиз агьвалат, гуьзел яр, 
Чир хьана заз гила ви гьал, 
Тирвал гьакъикъат, гуьзел яр.

Гъуьл
Кьве къуз хьанач лугьуз кIвачял 
Вуч гьавалат хьана вун чал. 
Гьафтедалди це заз мажал, . 
Мийир на зи япар биши.

Паб
Зи дердер на мийир таза. 
Низ гун за бес валай арза? 
Зи жавабдиз яб гуз кьваза. 
Зид хьана нубат, гуьзел яр.

Гъуьл
КIандайд я ваз чекме, калуш, 
Ам чун хьтин кесибд кар туш. 
Бес за гьикIин, къавумдин руш? 
Жафад хьана вун заз къарши.

Паб
Паб, гъуьл хьана сад тушиз сир, 
Мегер ян зун на кьур есир? 
Нагагь кватIа закни тахсир, 
Ая кван успат, гуьзел яр.

Гъуьл
Вун гъана хьана шумуд йис, 
Ийиз на заз ихьтин силис? 
Хъел кутамир вуна зак пис. 
Хъуьруьрмир чал къуни - къунши.

Паб
Уьмуьр хьана винни санбар, 
Дуьньядикай хьухь тIун хабар, 
Садни жеч хьи зун хьиз папар:
Им я мусибат, гуьзел яр.

Гъуьл
Гьикьван кьан за ваз бес кьинер? 
Жерид туш ваз лагьай ванер, 
Агъурна ахлад ви ценер, 
Аялар бес я ваз гъвечIи.

Паб
Твамир чанда акьван ялар, 
РикIе пис фикир, хиялар. 
Ha лугьудай а аялар 
Вал хьуй аманат, гуьзел яр.

Гъуьл
Къаст авачтIа ви зав туькIуьн, 
Ихьтин кардиз мад за гьикIин? 
Пуд чIал я зинни ви луькIуьн:
Хъфидайдаз - гьам я уьлчуь.

Паб
Рахамир вун акьван цавай, 
Къведа лугьуз жуван сивяй, 
Гахце на зи никягьдавай 
Къанни цIуд манат, гуьзел яр.

Гъуьл
Лугьун хупIда вуна серес, 
Мад гила туш зун ваз иес.
Санал вегьин герек туш мес, 
Ваз чидай кар амач хьи чи.

Паб
Гаф лагьайла, кефи хадай, 
Мез жедан бес акI рахадай? 
Гъил акъуд на зин яхадай, 
Минет хьуй, алат, гуьзел яр.

Гъуьл
АтIумир тIун, на зи аман, 
Вакай заз гьич жедач дарман. 
Гьелекмир фекъир Сулейман, 
Мийир адаз дуьнья мичIи.

Паб
 - Шa гьатмир вун а кIевера.
Фекьи-кавхадиз эвера, 
Жуван дердияр эзбера, 
Алуд Марият, гуьзел яр.

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.