Ажеб пис тiал

Саданни вилиз таквадай 
Ажеб пис тир тIал я кпул, 
Гагь элекьиз, гагь дакIвадай 
Гзаф пис мурдал я кпул.

Винел пад сагъ, къеняй начагъ, 
Агъу имир заз хъвадай чай. 
Мус акъатда вун зи кIвачяй, 
Бес вид вуч хиял я, кпул?

Гьикьван ида на зун бизар? 
Заз акурд туш ву хьтин азар. 
Жеч вун хьтин мердимазар, 
Вун гьакьван женжел я, кпул.

Гьикьван на зун кьаз юзурда? 
Ви дарман за гьикI жагъурда? 
Тваз мумкин туш вун гъавурда, 
Ваз чидайд ви чIал я, кпул.

Заз акурд туш ву хьтин ламатI, 
Чи дуван бес гьикI жеда кьатI, 
Вуч я ваз завай кIани затI? 
Вун вуч бейкамал я, кпул.

Сулеймамаз авайд я мез, 
Ви къаншарда сакIaн тежез, 
Мадни гзаф тIа жез кичIез, 
Факъирдин мез лал я, кпул.