Куьреда авай аламатар

Марифат майдан я Куьре, 
ХупI куь рахунар чида квез. 
Бегенмиш туш атIлac, дере, 
Саважугъли хун чида квез.

Дуст, за лугьун квез куь гьалар, 
Куь чандавай кьуру ялар, 
Мамрач чувударин малар - 
Абур куьк, яхун чида квез.

Дуьдгъвер лугьуз тIуьн хьана шур, 
Куь алчахвал хьана магьшур. 
А чувудди вичиз къачур 
Чехир пара хъун чида квез.

Лугьуналди жеч квез эсер. 
Пад хьуй гьахьтин къати нефсер, 
БашкIул кIвахьиз иски месер 
Шеле кIула кьун чида квез.

Гьич чIал авач квез, аферин! 
Кткана куь сивик хъуьруьн. 
Гьар са касдиз катран ерин 
Хуьз пара къузгъун чида квез.

Гьар са касди вичин синих 
Жезамач хьи квевай чуьнуьх. 
Куьгьне аба, кьилел сирих 
Акурла, ахун чида квез.

Лугьудай гаф: «гьарам - гьалал», 
Аватай кIус тийиз чилял. 
Душманар акурла, кьилял 
Яргъанар чIугун чида квез.

Эй, аннамаз гьахьтин фекъир, 
Мус чир хьуй ваз кардин эхир? 
Са валакай юзайтIа къуьр,
Акьахдай жугъун чида квез.

Эй Куьредин авам эллер! 
Фагьум тIун дуьньядин гьалер. 
Иеси кьей тупIал калер, 
Куьн кIватI жедай кун чида квез.

Гагь эхцигиз гъилер хурал, 
Фида куьн кIеви ахварал. 
Къуз са чIавуз Кьасумхуьрял 
КIватI хьана чукIун чида квез.

Сулейманаз вири чида, 
Кесиб яз жибин ичIида. 
Алачир чкадал жида 
Душмандиз сухун чида квез.