Хайи чIаларин гележег квелай аслу я?

21-декабрдиз Махачкъалада Дуствилин кIвале «ЧIалан кьисмет – халкьдин кьисмет: Дагъустандин халкьарин чIалар чирунин мумкинвилер гегьеншарун» лишандик кваз кьиле фейи мярекатда хайи чIалар хуьниз ва еримлу авуниз талукь месэлаяр веревирдна. Ана РД-дин Общественный палатадин членри, РД-дин Халкьдин Собранидин депутатри, милли чIаларал акъатзавай газетринни журналрин векилри, хайи чIаларин муаллимри иштиракна.

«Хайи чIалар хуьнин ва абур чирунин мумкинвилер гегьеншарунин месэла важиблубурукай сад я. Хайи чIаларин гележег экуьди хьун чи виридан мурад я. ГьикI лагьайтIа чакай гьич садазни пака чи несилар дидед чIаларикай магьрум хьана кIанзавач. Чна хайи чIалар хуьнин ва еримлу авунин жигьетдай государственный властдин органрилай гатIунна мектебра кIелзавай аялрал къведалди вирида кьабулдай, вири гъавурда гьатдай методика арадал гъана кIанзава. И месэладал кIукI гъун патал чаз куь теклифризни килигиз кIанзава», - лагьана элкъвей столдин кIвалах гатIундайла РД-дин Общественный палатадин председатель Гьамзат Гьамзатова.
Дагъустандин Халкьдин Собранидин образованидин, илимдин ва культурадин рекьяй комитетдин председатель Абдулгьалим Мачаеван гафарай малум хьайивал, хайи чIалар чирунин къурулушда гьялна кIанзавай месэлаяр гзаф ава. Адан фикирдалди абурукай виридалайни хциди хайи чIаларал бес кьадар учебникар акъуд тавун я.

«Мектебра хайи чIалар чирун патал учебникар бес жезвач. Чна кьиле тухвай мониторингдин сергьятра аваз, РД-дин Халкьдин Собранидин депутатар республикадин са жерге районрин мектебриз мугьман хьана. Нетижада малум хьайивал бязи мектебра хайи чIалан гьич са учебникни авачир классар ава. Хайи чIаларал ктабар акъудуниз республикадин руководстводи пулдин такьатар чара ийизвач лугьузни жедач. Мисал яз и кардиз алай йисуз 142 миллион манат чара авунвай. Алатай йисав гекъигайтIа, и кьадар хейлин тIимил тир», - къейдна А.Мачаева.

РД-дин Общественный палатадин член Гьабибат Азизовадин фикирдалди, хайи чIалар хуьнин ва еримлу авунин жигьетдай чIехи жавабдарвал милли чIаларал акъатзавай изданийрин хиве гьатнава. «ЧIал галачиз миллет гьич фикирдизни гъиз жедач. Хайи чIаларин михьивал хуьн, абурун сергьятар гегьеншарун милли чIаларал акъатзавай газетрилайни журналрилай аслу я», - лагьана ада.

РД-дин Общественный палатадин член Умар Жавтаева милли чIаларал акъатзавай изданийрин редакцийра хайи чIалар чирдай курсар кардик кутун теклифна. «Алай вахтунда Махачкъала шегьерда къекъведайла саки гьар са камунал инглис ва къецепатан маса чIалар чирдай курсарин малуматар гьалтзава. Дагъустандин чIалар чирдай малумат зал гьич садрани дуьшуьш хьанач. Гьавиляй зи кьилиз ихьтин фикир атана. Вучиз за милли чIаларал акъатзавай изданийра хайи чIалар чирдай курсар ахъаюн теклифзава лагьана хабар кьун мумкин я? Зи фикирдалди, анра хайи чIалар хъсандиз чизвай халис, тежрибалу пешекарри зегьмет чIугвазва. Абур хайи чIаларихъ рикI кузвай ватанпересар я», - къейдна У.Жавтаева.

Дарги чIалал акъатзавай «Замана» газетдин мухбир Мегьамедмухтар Муртузалиева хабар гайивал, абурун редакцияда ихьтин курсар ава. Гьафтеда са юкъуз хайи чIал чирдай ният авайбуруз пулсуз тарсар гузва. Дарги чIалан курсариз къвезвайбурун арада гьатта са табасаранвини ава. Малум хьайивал, адахъ дарги хизандай тир рушал эвленмиш жедай фикир ава. Гьавиляй жегьилди виликамаз вичин уьмуьрдин юлдашдин хайи чIал чирзава.
«Дагъустандин дишегьли» журналдин жавабдар секретарь Ажа Абдурагьмановади яхул чIалайни Махачкъалада курсар кардик квайди лагьана. Амма аниз къвезвайбурун кьадар лап тIимил я.

Хайи чIалар хуьнин ва еримлу авунин жигьетдай чпин фикирар Дагъустандин халкьдин шаир Шейитханум Алишевади, авар чIалал акъатзавай «Гьакъикъат» газетдин мухбир Кавсарат Сулеймановади, табасаран чIалал акъатзавай «Дагъустандин дишегьли» журналдин редактор Сувайнат Куьребеговади, Махачкъаладин мектебрикай сана авар чIалан тарсар гузвай муаллим Раисат Османовади, чечен чIалал акъатзавай «Нийсо-Дагъустан» газетдин кьилин редактор Умар Якиева, РД-дин Общественный палатадин член Бадрудин Мегьамедова, и цIарарин авторди ва масабуру лагьана.

Абуру Дагъустандин милли театрра нинийрин театрар кардик кутун, районра, хуьрера ясли-бахчайра тербиядинни чирвилерин гьерекатар хайи чIаларал кьиле тухун, хайи чIаларин тарсариз мектебра кьетIен фикир гун, «Дагъустан» РГВК-дай хайи чIаларал эфирдиз акъатзавай передачайриз чара ийизвай вахт артухарун, милли чIаларал акъатзавай изданийрин тиражар артухаруник вирида пай кутун, милли чIаларал акъатзавай изданийриз алава пулдин такьатар чара авун, абура тIимиларнавай полосайрин кьадар артухар хъувун, хайи чIаларай республикадин дережада аваз тешкилзавай конкурсрин, олимпиадайрин кьадар гзафарун… теклифна.

Элкъвей столдин нетижаяр кьадайла Гь.Гьамзатова къейд авурвал, мярекатдал гайи теклифрикай къиметлубур хкяна РД-дин руководстводиз, РД-дин Халкьдин Собранидиз, РД-дин печатдин ва информациядин министерстводиз, РД-дин милли политикадин министерстводиз рекье твадайвал я.

Мегьамед Ибрагьимов - "PORTAL21"

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.