Куьре эгьлийриз

Куьре эгьли тир лезгийрин
Терсина хиял гзаф я. 
Чпиз чпин акьул дерин, 
Чанарик квай ял гзаф я.

Я хийир чидач, я зарар, 
Са гафунал кьаз туш къарар;
Иеси кьей къавах тарар - 
Тан тIимил, чкал гзаф я.

Я дуст чидайд туш, я мидя, 
Туна чанда пара иддя, 
Арадал алачиз миддя, 
ГьакIан къалмакъал гзаф я.

Сивевай гаф - «валлагь, биллагь». 
Кар чидайбур туш гьакьиллагь. 
Гьар са дявединни силагь 
Дергесни мукал гзаф я.

Заз акуна шумуд чанар, 
Крар зурба пагьливанар. 
Чи Куьреда безирганар 
Kap тIимил, гьамбал гзаф я.

Гафар - зурба, крар - бада 
Ише тефидай эхирда. 
За фагъумна: чи нехирда 
Жунгав - тIимил, кал - гзаф я.

Фагьумнамаз вичин фурма:
Каракул хъицикь я бурма. 
Жедач чи тамара хурма - 
ЧIуру хват, чумал гзаф я.

АватIа ван жедай япар, 
Сулейман, на ая хабар, 
Фагьумнамаз - уьмуьр санбар, 
Акьулдиз аял гзаф я.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.