Юлдашар, куьгьне заманда
Гъилик жедай чун гьар писдан.
Авайди тир чIуру къайда
Вич залумкар келлегуьздан.
Шумуд сад бег, шумуд сад хан,
Кьенай чун, кIула кьадай кьван.
Гьар атайдаз уламдин къван
Язух гьал тир чи Дагъустан.
Гьар са куьнихъ хьана муьгьтяж,
Недай фазни тежез илаж,
Кесиб юлдаш жедай агаж,
Девлетлудав жедай майдан.
Гьар залумдив агъзур фяле, -
Гзаф жедай генан гьеле.
Батракдин туьд кьуна гъиле,
АкIажариз хадай гардан.
Фикир кIватIиз, гагь - гагь чкIиз,
Недай фу туьтуьна акIиз,
Лежбер - фялед ялна сад хьиз
Сирер хвена сада садан.
Гьадлай кьулухъ яваш - яваш
Хаинарал илигна лаш.
Ленинан рикI алай юлдаш -
Лувак фена чунни гьадан
СтIал Сулейманан ният
Тир гьал лугьун я гьакъикъат
Гьич кьабулмир на азият
Юлдаш, хамир рикI ажуздан.
I936
Добавить комментарий