Эхир чпиз регъуь хьана

Эй юлдашар, эвел гуьтIуь 
Куьгьне рекьер гьяркьуь хьана. 
Залумарин дердер кьати, 
Гъилер - кIвачер гъуьргъуь хьана.

Кьилди дуьнья чпиз гьализ, 
Месэлаяр гьа гьакI гьялиз, 
Пиянвал акъатна кьилиз, 
Эхир чпиз регъуь хьана.

3алумарихъ хьанач мирвет, 
Гьич кесибдиз тагуз къимет, 
Зегьметкешди чIугур зегьмет - 
ТIуьр затI чпиз агъу хьана.

Кесибар гьатайла кIеве, 
Чан кьиникьни кьуна хиве, 
Фяле юлдашариз дяве 
Ийиз ахпа ашкъи хьана.

ХьаначиртIа гьа къалмакъал, 
Гьалтдачир чун азад рекьял. 
Залумарин вилер акьал 
Хьана, вири буьркьуь хьана.

Шумуд малла, шумуд кешиш, 
Квахьна гьакI чпин яшайиш, 
Куьгьне гьава хьана дегиш, 
Шумуд дили - пехъи хьана.

Гьар са кардиз хьайи тариф 
СтIал Сулейманаз теклиф. 
Икьван кьуьзуь жез вун гьайиф, 
Яшдиз са кIус чIехи хьана.

I935