Хва кьей кас

Чир хьана ваз чIуру пеше,
ЦIай кягъз куз маркар, хва кьей кас.
Эхир физ туш, чир хьухь, ише
А на авур кар, хва кьей кас.

Вуна чIуру план чIугун, 
Гьайванарин алафар кун - 
Гьинай (а) тана ваз а закун? 
КIанзаван ваз чал алукIун 
Маса бармакар, хва кьей кас?

АлахъайтIан виш агъзур суз, 
Квевай жез туш чи кар агъуз - 
Къалай къуз винихъ я калхуз. 
Заз чидай гьал серфе ажуз 
Я вун фитнекар, хва кьей кас.

ЧIуру фитнеяр гьазурмир. 
Ахпамаз кицIи хьиз цIурмир. 
Ви кьежей дам чал юзурмир. 
Жафа я, вуна кьацIурмир 
Артух ви рангар, хва кьей кас.

Вуна авур чIуру хата, 
Гзаф пис я анин къайда. 
Чунни гьатда ви гъавурда:
Ви язух я, ви келледа -  
Гьатун гьахьтин rap, хва кьей кас.

Вуна авур а таракъкъи 
Ийиз тадач чна яргьи,
Кар кьунавач чна гъуьргъуь. 
Гила кьванни чиниз регъуь 
Хьанани ваз ар, хва кьей кас?

СтIал Сулейман ахварал 
Фидач, фикир кIватIна хурал. 
Кьаз авач зи рикIи кьарал. 
ЦIийи кьиляй мад чи хуьрял 
Эхцигун ян тIвар, хва кьей кас!

I935

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.