Наргимиш гьажикiа

Уьмуьраллагь зи яшинда 
Заз гьич тахьай ван хьана хьи. 
ЦIи Куьредиз хупI гишинда, 
И кар заз такIан хьана хьи.

Гьелбет, булда и гьажикIа, 
Нез хьун мумкин жедач вакIа. 
Тамам Дагъустанда, ЯркIа 
Мад адан дуван хьана хьи.

ЧIур хьуй вич акъатай ери! 
СтIалар, чIугвамир кири. 
КIватI жез Дагъустанни вири, 
Пуд манат мизан хьана хьи.

Хъипи машмаш хьиз я тини, 
Фан рангни я яру хини. 
Сиве турла туькьуьл хинни, 
Анал зун гьейран хьана хьи!

Са кIус за авуна дадмиш:
Яд тахъвайтIа жеда бамиш. 
Туькьуьлвилиз лап наргимиш. 
Им кьифре дарман хьана хьи.

Дад акурла тим жеда тух, 
Мумкин авач нез жез артух. 
Сарубугъда туна кьулухъ, 
Хархардиз майдан хьана хьи.

ТуьтIуьникай авач чара, 
Недайла акIида сара. 
Са пай туна хквед хьара, 
Гьам чIуру фарман хьана хьи.

Машиндалди бул хкведа, 
Теспягьдилай твар екеда. 
Заз такIан затI и уьлкведа 
Чи кIвализ мугьман хьана хьи.

Фагьумзамаз идан тегьер, 
Гьелбет, гзаф жеда бегьер. 
Эрекьни жеч ихьтин зегьер:
Зун тахъвай пиян хьана хьи.

Пул ганач лугьуз ви гъиле, 
Авуна заз ихьтин гьилле. 
Гьар фу недайла чи кIвале 
Хьайид йикь - шуван хьана хьи.

Вич ктIайд яз, гунуг масан, 
Рекьиз къаст ян вид зи хзан? 
Векъелар Малла Рамазан, 
Им батIул дуван хьана хьи.

Гана лугьуз шей аламаз, 
Ихьтин кардан бес, ярамаз? 
Ви кьилив зун лап аннамаз 
Ахмакь Сулейман хьана хьи.

I908 - I909