Перейти к основному содержанию

Мегер мусурмандин къайда...

Юлдашар, чи Куьре округ 
Бедбахт вилаят хьана хьи. 
Сад сада кутуна хурук, 
Як недай ният хьана хьи.

Буьркьуь ружад гъиляй ажуз 
Мегер жедан а автобус? 
За фагьумна, -  куьгьне ужуз 
Фитнеяр чал кIватI хьана хьи.

Мегер мусурмандин къайда 
Иви (э)къичун ян гьавайда? 
Им чи юлдашрин арада 
Тур са адават хьана хьи.

Хьайилахъди бомбадин ван, 
Келефдин кьил квахьна жуван, 
Ни авуртIан ихьтин дуван, 
Им бейадалат хьана хьи.

«Къведа» - лугьуз, къалуз туьрквер, 
КIватIна иниз къизил аскер. 
Бязи юлдашарин рикIер 
Пара хиянат хьана хьи.

Заз акур а гьафтедин югъ -  
Шумудан гьал хьана язух. 
Килиг тийиз вилик - кьулухъ, 
Кьил чиле тваз кат хьана хьи.

Кьейибур - кесибар вири, 
Жендекар нез гьакI кицIери. 
Бес им кьадардилай куьруь 
Тумакь шариат хьана хьи.

Гафар хъсан, амал чIуруз, 
Тарсар гана авамбуруз.
 КтIай еб яз, дегьне фуруз 
АтIана ават хкана хьи.

Чебни ахьтин авам эллер - 
Течиз кьилел къведай гьалер, 
Шумуд кесибарин кIвалер 
ЧIур хьана барбатI хьана хьи.

Эй Сулейман, и ви суьгьбет  - 
Дуьз рахун я видни, гьелбет. 
Акьуллудаз даим - эбед 
Зурба хажалат хьана хьи.

1930

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.