Хва тир эркек

Рекьиз гьайиф ахьтин чанар. 
Хва тир эркек Герейханов! 
Гьар инсандихъ гьахьтин гьунар 
Жеда тек-тек Герейханов

Гьахьтин дуьшуьш къведа кьилел, 
Гьелбет, (и)ви экъична чилел. 
Вун хьтинбуруз я гьалал 
Дидед гай нек, Герейханов.

КIватI хьайитIан са вилаят, 
Кьулухъ чIугун тушиз ният. 
Квайди я хьи пара гъейрат 
А ви бермек, Герейханов.

Сагълугъзамаз, вичин яракь 
Ахъайнач гьич вичив гвай ряхъ. 
Гьелбет, чи властдин чирагъ
Тир вилин экв Герейханов.

Шумудан рикI кана, цIивин 
Хьана, гьайиф чIугуна вин, 
Гьукуматдин мягькем замин 
Тир са дирек, Герейханов.

Хаинари ч1угур план, 
Гьелбетда, ваз хьана залан.
Инсанрин арада аслан 
Тир са зирек, Герейханов.

СтIал шаир Сулеймана 
Тир гьал ви тариф авуна, 
Вун хьтин виш кас гуьгъуьна 
КIан тир куьмек, Герейханов.

1930

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.