Алибег Фатахов - Хкягъай эсерар

М.Бабаханов

Алибег Фатахов лезги культурадин кьетIен вакъиа, хазина я, кIелзавайбуруз адан эсерар ала я, абуру сифтегьан ва юкьван школайрин программайра, учебникра, литературадин хрестоматийра, жуьреба- жуьре маса кIватIалра важиблу чка кьазва, адан яратмишунар Дагьустандин госуниверситетдин филологический факультетда чирзава, илимдин ахтармишунрин темаяр хьанва. Ам къанни вад йиса авай жаван яз кьена. Амма литературадал машгъул хьайи ирид-муьжуьд йисан къене ам гзаф кIвалахар ийиз агакьна: ада советрин лезги литературадин диб кутуна, цIийи жанраяр (эпический поэма, сатирадин новелла, очерк, повесть, шиирдалди кхьенвай роман) туькIуьрна. А. Фатахов переводчик, публицист, критик, журналист, фольклорист, учебникрин автор, аялрин писатель ва чкайрал алай литературадин къуватар агудайбурукай сад я.