Перейти к основному содержанию

Къудрат Велиханов-90: Хци сатирик, хъуьтуьл лирик

Къудрат Велиханов-90: Хци сатирик, хъуьтуьл лирик

XX асирда Къуба пата арадал атай лезги литературадин машгьур векилрикай адни жегьил йисара вичин шиирар "Кефчи Къудрат", гуьгъуьнай "Кьилегь Къудрат"  тахаллусралди кхьей чlехи шаир Къудрат Велиханов я. Цlи ам дидедиз хьунин 90 йис тамам жезва.
Кьилегь Къудратан поэзияди лезги фольклордай миже къачунва ва шаирди чи литературадин зурба классикар тир Етим Эминан, Стlал Сулейманан ва Хуьруьг Тагьиран традицияр чlехи сеняткарвилелди давамарнава.
Къудрат Кибечханан хва Велиханов 1922-Кьилегьрин хуьре дидедиз хьана. Хайи хуьре ирид йисан мектеб куьтягьайдилай гуьгъуьниз уьмуьрдин жаван вахтар Ватандин Чlехи дяведин йисарал дуьшуьш хьайи жегьил шаир 1942-йисуз фронтдиз рекье гьатна.
"-Ватандин чlехи дяве башламишайла за хуьруьн мектебдин ирид лагьай класс куьтягьна колхозда жувалай алакьдай гьар са кlвалах ийизвай: -рикlел хкидай шаирди- Кьилевайбурун, иллаки парабуру вил ягъазвай бригадирдин буйругъар кьилиз акъуддай. Военкоматдай эверайла Кцlариз, анайнияхди Худатдиз фенай. Чун фронтдиз рекье кутурди квез хъсан чидай Себри Бабаев тир."
Дяведин вахтунда адал 5 хер хьана. Ам Ватандин Чlехи дяведин I дережадин ордендиз ва маса наградайриз лайих акуна.
"-Хайи хуьруьз хтана бубадин кlвал-югъ  авай гьал акурла зи вилерилай мичlивал фена,-лугьудай фад-фад чал илифдай Кьудрат халуди.-Чlерейрик галай кlарасарни кваз хкудна канвай ина ацlукьнавай чаз мукьва са дишегьлиди. Мажбур хьана Гьасанбег лугьудай къуншидин кlвале амукьна, дяведай къуьнерик галаз хтай шинелдик къаткиз-къарагъиз мажбур хьанай зун..."
Ахпа куьмекдивди хайи кlвал туьхкlуьр хъувуна къайдадиз хкай жегьилди 1948-йисуз Жавагьирахъ галаз хзан къурмишна, веледрин иеси хьвана. 
 "-Шиирар кхьиз жува-жув кьатlайдалай, мектебда кlелдай чlавалай кьил кутунай за-лагьанай чlехи шаирди. -Рагьметлу Мирзагъа муаллимдиз кхьей цlарар къалурайла ада давамарун ва гзаф кlелун меслятнай. За адан гафуниз амална. Кьуьзуь жедалди ктаб акъудиз хьаначтlани, теснифриз ара ганач..."
Им шаирдихъ галаз адан рикl алай "Кцlарин" редакцияда эхиримжи гуьруьш ва ихтилат хьанай. Ам 2003-йисан июндиз кечмиш хьана хайи хуьре кучудна.

"Кцlар" газет

Рубрика

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.