Гала

Гьар сада вич гьахъ яз кьазвай дуьняда,
Гьахъ квахьна, гьакъикъат кIвачерик гала
НикIер ваъ, къалгъанар цазвай дуьняда
Рагъ кIани чи вилер мичIерихъ гала.
Гьа икI амазма зун цифер теснифиз,
Гуьлуьшан йикъар таз, йифер теснифиз,
Леф пата ацукьна Кефер теснифиз,
Леферда мекьерик, кьежерик галаз.

Ахъайна кьуд патахъ вичин чIуру хел
Дуьнядин хуруда гьатна вел-буьвел.
Квахьай гьахъ чилерал аламачиз гел
Чидан гьи кьацIарик, кьечIерик гала?!
Низ чидай элкъведи дуьня терсина,
Гьатнаваз чахъ галаз къалда, бягьсина.
Кьисмет къумаралла “миритI”, “тIерсина”
Бахтунун гъед къачур гъечIерик гала.

Яман дегиш хьанва и дуьня, аман,
Чир жезвач вуж ятIа патанди-жуванд,
Ягъийрин кIурарик акатна Ватан
Чи гъейрет, чи намус кIвачерик гала.
Вучда, гьахъ ксар илигдани кьван,
Нагьахъдахъ элкъвена лугьудани: “чан?”.
Чи ягьдин къеледин хкатнаваз кIан
Ягь фена чун незвай гъуьчIерик гала.

ЧIугваз хак акъатай дуьнядин хифет,
Уьмуьрдин дуст хьана азият, зиллет,
Итим текьей йикьа гьатнаваз Медет,
Адан гьахъ алчахрин кьуьчерик гала.