Кьудар

Са касдивай жузурла за
Вичин чIехи бубадин тIвар,
Са сятда хияларна
Лап гьада хьиз кудна япар.
          ***
Сада хизан хуьн паталди
Чан эцигна кIвалахзава,
Сада кутуна паб вилик
Са нел ятIа дамахзава.
       ***
Сад фидайла дустун кIвализ
Са эрекьни гваз фида,
Сад фидайла гъилер ичIиз
Дустунивай хъваз фида.
       ***
Сада уьмуьр гьалда вичин
Чи дагъларин лекьре хьиз,
Сада рикIел тегъиз рекьин
Гайи уьмуьр пехъре хьиз.
       ***
Инсан ава са чIавузни
Пехил тижер чарадал,
Инсан ава, ктIундай лап
Нагагь кицIин чкадал.