Чи гуьзгуьяр

Ханва екез чи хуьрера
Берекатар, гьуьрметар,
Авачизни туш гьарданбир
Акъулдин гьахъ туьгьметар,
Зи намус я, зи калам я
Чи хуьрера чIехибур,
Заз камалдин ктабар я
Гьа и чуру рехибур.
Гьабур я заз авурди чир
Абур, гьая, берекат,
Зегьмет, ашкъи, элдин къадир,
Уьмуьрдин рехъ, гьерекат.
Гьабур я заз авурди чир
Жуван къамат илигиз
Лугьузва за чи гуьзгуьяр,
А кьуьзуьбруз килигиз.