Санбар я

Я Самурдин кьерен чемен,
Къекъвез, зун ви сейрдава.
Мулд цуьквериз гуз за темен,
КIунчI кьуна зи гъиле ава.

Санбар я чеб гьар камуна,
Дуьшуьш жезва купа-купа.
КIватIун патал и цуьк суна,
Герек туш гьич кьуниз нупа.

ГьикI атана абур иниз?
Там-рукавай яргъава кьер.
Махпурдавай векьин чиниз
ЧукIурзава атирни хъвер.

Белки вацIни дагъдин шагьвар,
Хару, милайим цуькведин, 
Тум чукIурун патал икьрар
КутIунна жед, - кьер мезредин.

Тум чукIуриз набататрин,
ТIебиатдиз гар я панагь.
Герек кьадар къайгъу чIугваз, 
Вафалу яз, тежез икрагь.