Я дагълар

Душмандин кIвач галукьнач вахъ,
Бахтавар я, хам я дагълар.
Къекъведайла кьисметдихъ, фахъ,
Заз жагъайди гъам я, дагълар.
Зун мукувай къакъатнавай,
Къариблухриз акъатнавай,
Бегьем кьилиз такъатнавай
Кваквар атIай гам я, дагълар.
Зун мичIера, кIеве гьатна,
Залан парар хиве гьатна,
Къураматдин сиве гьатна,
Алугнавай там я, дагълар.
Къекъведайла кIвач жез аруш,
Кьилел алай чIарар-каруш,
Зун акьулсуз, са куьлягь руш,
Вун чIаганвай чам я, дагълар.
Гафар авай чIагай-чIагай,
ЦIарар авай дигай-дигай,
Шаирривай уьмуьрдикай
Къачуз хьанач кам, я дагълар.
Таж аватна, цIвена зи тахт,
Гъиляй-гъилиз фена зи тахт,
Зи жегьилвал, ашкъи, зи бахт
Гъамар гъиле рам я, дагълар.
Авай тиртIа дерт
алцумдай мизанар
Дамах гана азардизни за зардал,
ТIалдин гъиляй чан
хьантIани жазданар.
Дердер, гъамар акъуддай за базардал,
Авай тиртIа дерт алцумдай мизанар.
Вилин накъвар-багьа затIар алцумдай,
Сан къалурдай гуж акакьдач къапандин.
Рехъ квадарда, эхкъечI
жедач къумлухрай,
Эхир жеда сарбан кьейи карвандин.
И кьадардиз, и кьисметдиз вуч лугьун,
Як такурдаз къалурзавай тухулар.
Къван гуналди, пешер, хилер хуналди,
Кьурадай туш зи тарарин дувулар.
Шиш дагъларин синералла зи геллер,
Дагьаррани квадарнавай сандалар.
Къадагъайри кутIунайтIан зи гъилер,
Зи фикирриз ягъаз хьанач къандалар.
Дамах гана азардизни за зардал,
ТIалдин гъиляй чан
хьантIани жазданар.
Дердер, гъамар акъуддай за базардал,
Авай тиртIа дерт алцумдай мизанар.
Къван гудай за шейтIандиз
Чил-цав кудай ялав ава зи хура,
И цIай акур кафир къведа имандиз.
Заз дерт гайи гъуцарив гва зи чара,
И азар чир хьайиди туш лукьмандиз.
Алим ава мад илимдин гьарайда,
Мад шел-хвал я зи гьиссерин сарайда.
Иви хъвана вилера къан авайда,
ЦIай ягъада техил авай хармандиз.
Дустар ава тикединди, кIусанди,
КIус акурвал жеда абур хъсанди.
Кьиле акьул амачир са инсанди,
Вичин гъилив еб вегьида гардандиз.
Са кардайла алукьначтIа чIехидал,
ГъвечIи кьиле гьатда гзаф чIехи тIал.
ГъвечIибуруз ийиз канда ЧIехивал,
Карвандини яб хгузмач сарбандиз.
Крчунивди ягъна лугьуз ламра кал,
Гьар няниз гьатдай хуьре, кIвале къал,
Амукьдачир садни чкIун тавур кIвал,
Рахадай мез ганавайтIа гьайвандиз.
Къваза лугьуз минетдай за вядедиз,
Хъвер вегьидай дердер авай гьебедиз.
Кьисмет хьана, физ хьайитIа Кябедиз,
Ирид юкъуз къван гудай за шейтIандиз.
Бине канда, асул канда виридаз
Кьилиз гуда гзаф чIехи зиянар,
Тяди галаз акъудзавай къарарди.
Хци хьана зи кьатIунар, баянар,
Чирна заз са акьул гьар са зарарди.
Ял жед лугьуз акъвазнавай ятара,
Вирин цикай гьаяз къведай
туш чарчардиз.
Жавагьирар гатаз гумир чатара,
Къизилдин мас хъсан чида заргардиз.
Са гъиливай кьаз жедай туш
кьве къарпуз,
Жуваз юлдаш яхъ вуна хъел, я сабур.
Са къажгъанда ргадач кьил кьве гьерен,
Са къекъера тваз жедай туш кьве гапур.
Вуч эцигда, чидач, пурар, я алух,
БалкIан тушир, я лам тушир къатирдал.
Пекер алгуз канз ийимир на чалух,
Бинедай чIар акъат тавур туртурдал.
Вахт тахьанмаз дигмиш жедач са майва,
Рум гуналди тарал алай кIурукIдиз.
Яд гайтIани, тагайтIани са кар я,
Туьтуьнай тIвек акъатнавай кукупIдиз.
Кьейи касдиз вавай вай гуз тахьайтIан,
Пай кан жеда, гьай кан жеда диридаз.
Тефир авач, я инсан хьуй, яни тар,
Бине канда, асул канда виридаз.
Зи булахар къайибур я, къайибур