Кlанда заз

Рехи жезва югъ-йикъандлай ч1арар зи,
Хайи чилин Шагьдин шагьвар к1анда заз!
Туьхъуьн тахьуй чанда рик1ин ц1аяр зи,
Уьмуьрд зулуз ц1ийи гатфар к1анда заз!

Гьар пакамахъ къарагъайла ахварай
Рик1из к1ани атир къвезва нвакьарай!
Каспидилай кьакьан Шагьдин яхаяр -
Ватан лугьур дигай бахтар канда заз!

Нур чк1ида зи Ватандин къванцикай,
Гуж къачуда хайи ч1алан ванцикай -
Кич1едач заз кьилел къвадай харцикай,
Чи Муьшкуьрдин мвегъуьн тамар канда заз!

И чилерик чи рик1ерай ц1ай гала,
Гур вац1арик чи дамаррай пай гала,
Лайлайрикни векъи гьарай, гьай гала
Ватандин "ни къведай" гафар канда заз

Бед легьзеяр яваш-яваш ц1разва,
Чанда ч1ехи са к1анивал ргазва,
Гарари  хуш макьам-мани "хразва"
Ватандин руг галай камар канда заз!