Къвемир зул!

Са к1ус кьван, зул, акьваз, къвемир тади галаз вун,
Мвегъуьн къацу пешери чаз мани лугьурай!
Гьикьван вахт я раханавач ярдихъ галаз зун
Са сефердан таран к1аник к1анид хтурай!

Ац1урин за ярдин къужах тамун цуькверив,
Ракъини чи рик1ерин ц1ай къати авурай.
Туьхъуьнармир чи савдаяр ламу циферив,
Чи теменриз килиг ийиз къушар атурай!

Лацу ягълух гахчуда за адаз багъишай -
Чаравилин лишанрикай гелни тамукьрай!
Алемди чи к1анивилиз кьилди алхишрай,
Рик1 акъудна ярдиз гуда, даим амукьрай!

Чи Каспидин лепейрикай лирли хкатиз
Хуш я рик1из, чи теменриз мадни аваз гун.
"Храда" за ярдиз кифер мецив хк1ат1из
Са к1ус кьван зул, акъваз, къвемир тади галаз вун!